Un desproporcionado dispositivo policial permitiu ao alcalde Abel Caballero
cumprir a súa ameaza. Na noite da cuarta feira, o barco Bernardo Alfageme foi
trasladado á rotonda de Coia, contra a vontade da veciñanza. Houbo cargas
policiais e até 6 persoas feridas.VÍDEO NO INTERIOR.
H.V. // O.R.
xoves 18 de febrero do 2015
[CC-BY-NC-SA Gzfoto] |
Tivo que ser
pola forza e con nocturnidade o traslado do barco Bernardo Alfageme. Segundo
informa VigoDixital, a operación policial de
vixiancia da rotonda principiou por volta das 20.30 horas, cando un grupo de
veciñas e veciños se achaban alí concentrados, e o traslado non comezou até a
1.30 horas da madrugada.
A 1.30 horas
o grupo de veciñas e veciños foron acordoados pola policía e posteriormente
empurrados cara á beirarrúa, advertidos polo oficial ao mando da operación de
que se estaba a aplicar a lei de seguranza cidadá.
O traslado
tivo as súas incidencias. Non é doado manobrar cun barco pola rúa. O buque
bateu co túnel de entrada a Castelo, o que provocou certo desconcerto. Algunhas
veciñas e veciños aproveitaron a ocasión para tentar safar da vixiancia
policial. Foi entón cando se produciron as cargas, saldadas con 6 feridos.
Ás 2.30
horas o barco xa estaba instalado na rotonda.
O colectivo
veciñal anuncia que non vai ficar de brazos cruzados e que continuará coas
mobilizacións.
A operación
de traslado foi contemplada in situ por dúas pezas básicas do goberno local
vigués: os concelleiros de Seguranza e Xardíns, Carlos López Font e Ángel
Rivas, este último secretario de organización do PSOE local, imputado no caso
Formigón e investigado na Operación Patos.
Dous meses e
medio contra o barco, tres anos de loita
A veciñanza
mantivo na xornada de onte no barrio de Coia unha loita que se prolonga perante
a rotonda da avenida Castelao desde hai "dous meses e medio" mais que
vén "desde hai tres anos" reclamando "xustiza social",
explica en conversa con Sermos Galiza Emilio Velasco, unha das voces da asemblea
aberta de Coia e cura na parroquia do Cristo da Vitoria.
"O
barco é o símbolo da política de despilfarro" do goberno de Abel
Caballero, apunta, mentres "nos barrios, tamén no de Coia, a situación é
extrema" pois, explica, "o diñeiro que entra nas casas é escasísimo
ou nulo".
A veciñanza
continuará resistindo, "este é só o primeiro chanzo", advirten
A súa é unha
"resistencia pasiva" e non violenta que na madrugada de hoxe volveu
saír ás rúas da cidade olívica, desta volta, "tomada" polas forzas
policiais. "Non mandaron os militares de miragre, é incríbel",
subliña.
Da
confrontación coas ducias de axentes desprazados "varios veciños tiveron
que ir ao centro de saíde polos tiróns" da policía. "Non foron
lesións graves mais tamén denunciaron para que vexa o señor alcalde que os
violentos son os que manda" e non a veciñanza, acrecenta Emilio.
Após
colocaren o Bernando Alfageme na rotonda "a loita continúa", aseguran
desde a asemblea aberta de Coia, "este é só o primeiro chanzo". Para
esta quinta feira (19 de febreiro) ás 18.30 horas convocaron unha concentración
perante o barco. A de onte, din, "foi unha experiencia que nos motivou
moito". "Non pararemos até que os servizos sociais sexan
dignos", sentencian.
VIDEO:Dispendio e violencia policial no traslado do
#Alfageme a Coia
Fonte: http://www.sermosgaliza.gal/
No hay comentarios:
Publicar un comentario